Cleveland og hverfin hennar
Cleveland er borg sem kemur stöðugt á óvart. Að skoða nútímalist í gamalli rafstöð, hlusta á sinfóníuhljómsveit spila á pylsustað og að borða innbakaðar nautakinnar á fínum veitingastað hljómar allt eins og dæmigert Cleveland. Þetta er nefnilega ekki borg fyrir þá sem þrífast í rammanum heldur þá sem taka lífinu ekki of alvarlega. En hvar er mesta lífið að finna? Hér fylgir stutt kynning á helstu hverfum Cleveland og sérkennum þeirra.
University Circle
Þetta eru höfuðstöðvar þeirra framsæknu og akademísku. Hér er allt morandi í lífi – allt frá háskólasvæðunum í kringum Case Western Reserve University og University Hospitals til safnasvæðanna í kringum náttúrufræðisafn borgarinnar og Listasafn Cleveland. Það tekur enga stund að komast hingað frá miðbænum með RTA HealthLine.
Ohio City
Matgæðingar og bjórkúnstnerar sækja mikið í markaðina í Ohio City hverfinu. Vinsæll áfangastaður er t.d. West Side Market sem er vestur af miðbænum, hinum megin við Cuyahoga-á. Þar hefur verið hægt að versla eðalkjöt, fisk og grænmeti síðastliðna öld eða svo og stemningin á sölubásunum er prúttvæn og vinaleg. Ohio City hverfið er góð samsuða af hipsterum og hefðum sem sést hvað best á klassískum byggingarstílnum, sjarmerandi matstofunum og frægu míkróbrugghúsunum. Við mælum með því að smakka á exótískum réttum á markaðnum, klifra upp stigana á W. 25th Street til að skoða magnað útsýnið og kíkja í TownHall til að bragða á dýrindis mat með æðislegu bjórúrvali.
Tremont
Tremont er verkamannahverfið sem vegur upp á móti stórborginni með þægilegum smábæjarsjarma sínum. Það er steinsnar frá miðbænum og eitt elsta hverfi Cleveland. Skoðaðu gömlu húsin, gamaldags hverfisbarina, fallegu kirkjurnar og hittu fyrir kumpánlega karaktera hverfisins. Við nánari skoðun koma í ljós fölskvalausir barir inni á milli glæsilegra veitingastaða, listagallería og popplistaskúlptúra. Við mælum sérstaklega með hádegisverði á Grumpy‘s Café ef þú ætlar að fara alla leið í kósímat í Cleveland.
Detroit Shoreway
Bóhemarnir halda helst til í listahverfinu í kringum Gordon Square í Detroit Shoreway hverfinu þar sem gömlu og glæsilegu herrasetrin setja fallegan svip á umhverfið. Leikhúsin draga listaspírur og jaðarþenkjandi borgarbúa á svæðið og svangir tískufrumkvöðlar taka strikið á steikhúsin og barina í hverfinu. Grænu svæðin eins og Edgewater Park og vatnið við hann laða að sér hundaeigendur, lautarferðalanga og brimbrettakappa í öldufráhvörfum.
Little Italy
Maturinn, trúin og hin fræga Maríumessa eru það sem gerir þetta hverfi við Murray Hill svona sérstaklega ítalskt. Ítalskir handverksmenn settust hér að í byrjun 19. aldar en í dag er „Litla Ítalía“ hlaðin dásamlegum ítölskum bakaríum, matstofum og þar er líka að finna elsta veitingastað Cleveland: Guarino‘s.